एजेन्सी असार १९ ! नासा/ईएसएको हबल स्पेस टेलिस्कोपले लायरा (वीणा) नक्षत्रमा अवस्थित सर्पिल आकाशगंगा UGC 11397 को एक अद्भुत दृश्य कैद गरेको छ, जसको प्रकाश टेलिस्कोपसम्म पुग्न झण्डै २५ करोड वर्ष लागेको थियो। पहिलो नजरमा सामान्य जस्तो देखिने यो आकाशगंगाले वैज्ञानिकहरूको ध्यान खिच्नुको मुख्य कारण यसको केन्द्रमा रहेको विशाल कालो प्वाल हो।
UGC 11397 को मुटुमा रहेको कालो प्वाल सूर्यको तुलनामा १७ करोड ४० लाख गुणा बढी भारी छ। यस्तो महाविशालकाय ब्ल्याक होलले वरिपरिका ग्याँस, धूलो र कहिलेकाहीं पूरै तारा समेत तानेर अत्यधिक तापमा पुर्याउँछ, जसले गर्दा ब्रह्माण्डीय प्रकाशको एक रोमाञ्चक प्रदर्शनी देखिन्छ।
यो सक्रिय ब्ल्याक होलले गामा किरणदेखि रेडियो तरंगसम्मको ऊर्जा उत्सर्जन गर्दछ। यद्यपि, बाक्लो धूलोको पर्दाले यस उज्यालोलाई दृश्य प्रकाशमा लुकाइदिन्छ। यस्तै परिस्थितिका कारण यसलाई वैज्ञानिकहरूले “प्रकार २ सेइफर्ट आकाशगंगा” को रूपमा चिनाएका छन्, जहाँ कालो प्वालको गतिविधि केवल उच्च उर्जाका एक्स-रे किरणमार्फत मात्र देख्न सकिन्छ।
हबल टेलिस्कोपद्वारा यस्ता सयौँ आकाशगंगाहरूको अध्ययन हुँदैछ जसले विशाल कालो प्वाल बोकिरहेका छन्। यस अध्ययनले नजिकका ब्ल्याक होलहरूको तौल निर्धारण, ब्रह्माण्डको सुरुवाती कालमा ती कसरी हुर्किए भन्ने बुझ्न, र आकाशगंगाको केन्द्रमा ताराहरूको जन्म कस्तो हुन्छ भन्ने अनुसन्धानमा महत्त्वपूर्ण योगदान पुर्याउनेछ।
