काठमाडौं जेठ १५ ! नेपालको आर्थिक वर्ष २०८२/८३ को लागि सरकारले १९ खर्ब ६४ अर्ब ११ करोड रुपैयाँको बजेट प्रस्तुत गरेको छ। यो बजेट उपप्रधान तथा अर्थमन्त्री विष्णुप्रसाद पौडेलले संसद्को संयुक्त बैठकमा प्रस्तुत गरेका हुन्। बजेटको स्रोतमा राजस्वबाट १३ खर्ब १५ अर्ब, आन्तरिक ऋणबाट ३ खर्ब ६२ अर्ब, वैदेशिक ऋणबाट २ खर्ब ३३ अर्ब, र वैदेशिक अनुदानबाट ५३ अर्ब ४५ करोड समावेश छ।
कर्मचारीको तलब वृद्धि नभए पनि साउन १ गतेदेखि महँगी भत्तामा राहत दिने प्रयास गरिएको छ। सामाजिक सुरक्षा भत्ताको उमेर हेरफेर भएको छ, जसमा ज्येष्ठ नागरिकको वृद्ध भत्ता पाउने उमेर ६८ बाट बढाएर ७० वर्ष कायम गरिएको छ, र दलित तथा एकल महिलाको भत्ता पाउने उमेर ६५ वर्ष तोकिएको छ। यी परिवर्तनले सामाजिक सुरक्षा कार्यक्रमलाई थप व्यवस्थित र एकीकृत गर्ने लक्ष्य राखिएको छ।
बजेटले उद्यमशीलता, रोजगारी, उत्पादन, र गुणस्तरीय भौतिक पूर्वाधारमा जोड दिएको छ। यद्यपि, राजस्व संकलनमा कमी र खर्चको दबाबका कारण मितव्ययिता कायम गर्ने नीति अबलम्बन गरिएको छ।
