काठमाडौं जेठ १५ । काठमाडौँको टोखा नगरपालिका–५, बसुन्धरामा अवस्थित ईशान बाल तथा महिला अस्पतालले आर्थिक रूपमा कमजोर वर्गका बिरामीहरूका लागि १०% शैय्या निःशुल्क प्रदान गर्ने व्यवस्था गरेको छ। यो सुविधा नेपाल सरकारको नीति अनुरूप हो, जसले निजी अस्पतालहरूलाई कुल शैय्याको १०% विपन्न, असहाय, अपांगता भएका, वृद्ध, एकल महिला र बेघर व्यक्तिहरूका लागि निःशुल्क राख्न निर्देशन दिएको छ ।
सेवा समय र सुविधाहरू
सेवा समय: २४ घण्टा आकस्मिक सेवा र बिहान ८ बजेदेखि बेलुका ८ बजेसम्म ओपीडी सेवा।
विशेषज्ञ टोली: बालरोग, स्त्रीरोग, प्रसूति, छाला, कान-नाक-घाँटी, दन्त, हाडजोर्नी, न्यूरोलोजी, रेडियोलोजी, फिजियोथेरापी लगायतका क्षेत्रमा विशेषज्ञ चिकित्सकहरू कार्यरत छन्।
अत्याधुनिक सेवा: बाल बोनम्यारो प्रत्यारोपण, सिटी स्क्यान, पेडियाट्रिक तथा एडल्ट इन्डोस्कोपी र कोलोनोस्कोपी सेवा सञ्चालनमा ल्याइएको छ।
नवजात शिशु सेवा: एनआईसीयू, पेडियाट्रिक आईसीयू, भेन्टिलेटर, इन्क्युबेटर लगायतका सुविधा उपलब्ध छन्।
शैक्षिक पहल: नेपालकै पहिलो बाल शल्य चिकित्सा फेलोशिप कार्यक्रम
ईशान अस्पतालले नेपालमै पहिलो पटक ‘क्लिनिकल फेलोशिप इन पेडियाट्रिक सर्जरी’ कार्यक्रम सुरु गरेको छ। यो एक वर्षे कार्यक्रम हो, जसमा सहभागी चिकित्सकहरूले बाल शल्य चिकित्सा सम्बन्धी गहिरो ज्ञान र व्यावहारिक अनुभव प्राप्त गर्छन्। कार्यक्रमको नेतृत्व अस्पतालका कार्यकारी निर्देशक तथा प्रमुख बाल शल्य चिकित्सक प्रा. डा. रामनन्दन प्रसाद चौधरीले गरेका छन् ।
यस कार्यक्रम अन्तर्गत, डा. धन बहादुर श्रेष्ठले १३ अप्रिल २०२४ देखि १३ अप्रिल २०२५ सम्म अध्ययन तथा तालिम प्राप्त गरी सफलतापूर्वक स्नातक भएका छन्। यो कार्यक्रम नेपाल मेडिकल काउन्सिल (NMC) द्वारा अनुमोदित नेपालकै पहिलो Pediatric Surgery Fellowship हो, र यो नै ईशान बाल तथा महिला अस्पतालको पहिलो Fellowship Program पनि हो ।
ईशान बाल तथा महिला अस्पतालले तीन दशकदेखि बालबालिका र महिलासम्बन्धी स्वास्थ्य सेवामा महत्वपूर्ण योगदान पुर्याउँदै आएको छ। निःशुल्क शैय्या सुविधा र शैक्षिक कार्यक्रमहरू मार्फत्, अस्पतालले सबै वर्गका बिरामीहरूलाई गुणस्तरीय र पहुँचयोग्य सेवा प्रदान गर्ने थप प्रतिबद्धता जनाएको छ।
