काठमाडौं | ब्राजिलका स्टार फरवार्ड नेयमारले अन्तर्राष्ट्रिय फुटबलबाट सन्न्यासको घोषणा गरेका छन्। फिफा विश्वकप २०२६ को अन्तिम–१६ मा ब्राजिल नर्वेसँग २–१ ले पराजित हुँदै प्रतियोगिताबाट बाहिरिएपछि उनले राष्ट्रिय टोलीबाट आफ्नो यात्रा टुंग्याउने निर्णय गरेका हुन्।
३४ वर्षीय नेयमारले ब्राजिलका लागि १२९ अन्तर्राष्ट्रिय खेल खेल्दै ८० गोल गरेका छन्। उनी ब्राजिलको पुरुष राष्ट्रिय टोलीका इतिहासकै सर्वाधिक गोलकर्ता खेलाडीका रूपमा अन्तर्राष्ट्रिय करियरबाट बिदा भएका छन्।
नर्वेसँगको हारपछि भावुक बनेका नेयमारले भने, “मैले प्रयास गरें, धेरै प्रयास गरें। मेरो यात्रा यही स्टेडियमबाट सुरु भएको थियो र यहीँ अन्त्य भयो। अब सबै सकियो।”
सन् २०१० मा ब्राजिलबाट अन्तर्राष्ट्रिय डेब्यु गरेका नेयमारले चार संस्करणको फिफा विश्वकप खेले। उनले २०१६ को रियो ओलम्पिकमा ब्राजिललाई पहिलो पटक ओलम्पिक फुटबलको स्वर्ण पदक जिताउन कप्तानका रूपमा महत्त्वपूर्ण भूमिका निर्वाह गरेका थिए।
बार्सिलोना, पेरिस सेन्ट-जर्मेन र ब्राजिलको जर्सीमा आफ्नो उत्कृष्ट कौशल, ड्रिब्लिङ, सिर्जनात्मक खेल र निर्णायक गोलमार्फत विश्वभरका फुटबल समर्थकको मन जितेका नेयमारको अन्तर्राष्ट्रिय यात्राले ब्राजिलियन फुटबलको एक स्वर्णिम अध्यायको अन्त्य गरेको छ।
